[巴黎]2009春節巴黎之旅day4：加尼葉歌劇院+海鮮大餐

2009/1/28

加尼葉歌劇院位於血拼勝地老佛爺和春天百貨附近。知名舞台劇Phantom of the Opera就是以此劇院作為舞台背景。我未欣賞過Phantom ，但就對金田一的歌劇院殺人事件印象深刻！(因係同人場景前後發生3次咁多)

入場費要€8，有點貴，但內部裝潢得華麗又壯觀，令人難忘~~~

但參觀觀眾席時，只開了一兩度門給我們在高台欄杆上看看，就未免有點小家。而且，停留不到3分鐘，就比後面local tour的導遊趕客(英文)：「後面有人入緊黎，你地影完相未？」態度勁串！因在場還有其他外國人影緊相，又唔見你趕佢地走？你見人多，唔識開多幾度門咩？真不懂變通！

ZIDANE AH~~~佢係法國真係做左廣告天皇~~~

5:15pm: 今日行羅浮宮消耗好多體力，個肚開始打鼓，又未到食飯時間。於是去去PAUL食D野，PAUL就近似於香港嘅星巴克，但就有好多法國傳統餅食。可能當時人客太多，原本我叫了一個咸肉芝士批，但店員卻給了一個凍冰冰的RASIN BREAD，仲話我無叫過...真係激氣。熱騰騰的咸肉芝士批來了，雖然較為肥膩，但芝士味很香濃，正！太太叫了Vinilla Big Macaron+hot chololate。看來她已迷上了杏仁蛋餅此地道美食。而熱朱古力更不是像香港茶餐廳般，用三花牌朱古力粉沖。他們是用朱古力漿調製而成，所以濃到有點黐喉的感覺，好唔好飲真係見人見智。

離開阿paul，到了米耶之家(La Maison du Miel)採購蜜糖，可能係獨市生意，店員態度亦較傲慢(可能係我偏見啦)，她給了4種蜜糖給我們試，但她的樣子好像很擔心我們是來混吉的！最後買了香橙味及原味蜜糖，給嫲嫲做手信。

經過一座充滿古典希臘神殿風格的建築物，原來是基督教的瑪德蓮教堂。原來幾百年前法國人已經流行crossover，仲要係拿破崙添！他每次打贏仗，就會興建各式建築物慶祝，所以巴黎就多左好多個景點喇！

曾志偉話：香港終於有自己嘅手信店。但原來巴黎喺一百年前已經有手信店，講嘅係FAUCHON。入到去，以為自己行緊百貨公司，各式各類食品應有盡有，而且包裝美觀....好似賣緊廣告，但原來...香港機場今年已開了一間小小的FAUCHON，所以話...香港真係咩都有....(N年前亞視某節目台詞)

6:48PM 晚上的歌劇院配合夜燈，更顯華麗、璀璨。

卡普辛餐館(Le Grand Cafe Capucine)離歌劇院很近，這裡氣氛很warm，我們品嚐了海鮮拼盤，果然新鮮，生蚝、青口等，充滿海水天然味道，令我們回味無窮！

來法國就要試下地道特色菜，法式洋蔥湯(Soup a' I'onion gratine')就是其一，佢地真係成個洋蔥俾埋你，湯面則用厚厚的芝士包著。太太似乎對這太濃郁的湯敬而遠之，我就覺得幾得意，因為從未飲過嘛~~~

常聽聞法國大餐~~偈後語是~~~多舊魚~~~所以就點了沙爹汁香煎三文魚~~配搭得幾好~~~

甜品就點了雲尼拿雪糕配朱古力泡芙。外冷內熱的感覺，為此大餐劃上完美句號。

今餐是此行中清費最高的，用了€90！看來明天要節儉一點了....

搭metro回酒店，又見到賣藝者拿著電子琴走入車廂sell歌藝。可惜今次的演出很不認真、又走音又無氣，很多乘客都裝作不見到他們。我地亦借了聾耳陳隻耳仔~~~咦~~老婆，到站喇！快d走啦！

下回預告：新年流流貝爾墓園探險記~~~