天氣有點轉涼，蠢蠢欲動，一於成家人來個溫泉之旅。原本一早在星晨報了名去古兜，可惜最後成不了團(問康泰、東瀛遊卻稱已爆團，激死)！幸好永安開平2天團仲有位，諗都唔駛諗，即報啦！
到達九州港，乘旅遊巴到達第一站---龍井坊風情園。那兒出奇地沒有茶葉出售，卻有一口龍井，不斷有水湧出，據聞洗完手，打麻雀自模都多幾鋪，大家都蜂擁而上，希望行行財運。
另外有富農村風味的玩意：騎熱鬥小馬，坐慢到嘔嘅牛車、射箭，擲飛鏢(想像唔到？？)我騎的拉屎狀，有時急停，有時疾走，都幾過癮！餓極了，幸好有馳名省港澳的紅燒妙齡乳鴿醫肚，又有可以用黎打乒乓波嘅炸鯪魚球，加上長壽山山水制成的滑滑豆腐花，正合時宜！難怪肥滔亦曾為坐上客：好味呀！好好味呀！
另外，這兒的五星級茅厠亦被各位有公德心的旅客貼滿了入場label，令它充滿後現代主義的綠色風味，確實蔚為奇觀。
第2站，到達蜜蜂博物館，雖然明知唔係「博物館」咁簡單，但亦可從中見識大陸企業的sales and marketing技倆。這處以教育蜜蜂知識作掩飾，教導大家揀蜜糖的方法。大家都認為蜜糖應是甜的，今天卻仿似醍醐灌頂！原來酸酸的才是正宗！知道啦！你賣的就一定係好野！但因唔夠hard sell，又或許我們定力夠，他們的銷售額可能meet唔到target，好慘！！為食的筆者和母親，則無懼三聚氰胺威脅，幫襯了花粉燉蛋，縱使不覺得與一般燉蛋有何分別...
行完蜜蜂博物館(其實係蜜蜂產品展銷中心先啱)，之後就到濠江鉅記買手信，點解嗰名咁熟嘅？原來舊年跟永安去番禺，都係黎依度架！濠江鉅記其實係永安嘅珠江三角洲親密戰略性合作夥伴，所以標價都貴d，因為要俾回佣嘛！不得不提，來中山一定要食神灣菠蘿，體積細細，清甜多汁，爽脆無渣，又香又甜。鉅記旁邊就有多間不收回佣的特產店，爸媽都大有收獲。
然後到酒樓 食古法泥煨雞宴。味道ok，但其他菜色則普通不過，旅遊團體餐係咁架啦！所謂好食食多d，唔好食就食飽d！但點解又有鯪魚球架，早知係龍井坊唔駛叫兩盤咁多啦！
龍井坊不賣龍井、布依族不穿布衣？
想見識更高明的銷售手法，我會建議你去參觀雲錦布依族民化村。可能看得多樂施會的廣告節目，布依族的CEO得到啟發，終於知道如何有效俘虜消費者的心靈。比用功夫來包裝足球更強的手法，就是用助養雲南山區小童來包裝賣茶葉！！！扣取所有行政支出，將全部撥捐雲南(咁咪所剩無幾？)。
只要買滿人仔210大元，不送你贈品，卻會頒發獎狀一張，表揚你對拯救貧窮孩子所作出的貢獻！
點解依位阿姑咁似零零發入面嗰個劉以達嘅？忍唔住啦！我要大叫~~~大夫(高八度)！！
坐係度呢位二姑娘，真正身份係tea leaf senior sales manager(TLSSM)！不過佢講故仔、攪爛gag都幾過癮。原來係布依族，結左婚嘅女士叫阿奴。令我想起當年玩dos版仙劍奇俠傳中苦戀李逍遙的苗族女孩阿奴(但人地係未婚嘅)。
最後我地都買左罐「聰明茶」(飲左會瞓得好D喎！)，算係咁啦！
設計對白：今個月做唔夠QUOTA，實俾二姑娘省鑊甘啦今次(無眼睇)！！
探完布依族，令我有興趣知多D中國小數民族的知識，以下網站都幾多資料架。
下午，前往中華民族風情園，欣賞少數民族歌舞show<<美麗的西雙版納>>及女子變臉絕技。盞鬼的司儀使我們捧腹大笑，精采的表演，令我們嘆為觀止，輕鬆度過愉快的一小時。壓軸一部份為少數民族招親比賽，爸爸有幸獲邀上台，表演民族舞蹈，實在非常難忘。
睇完show，旅遊巴就前往今晚住宿的香江溫泉酒店，途經開平雕樓群。可惜的是只能遠遠眺望，未能近距離觀賞。開平雕樓群http://www.kaipingdiaolou.com/。接待的大陸巨邦旅行社導遊源仔沿途不斷推銷古法泥煨雞，話煮好後今晚10：00會送到酒店房間作宵夜。我心知不妙，因行程表上明明寫著酒店自助晚餐，為何還要咁早食宵夜？
原來酒店自助晚餐，真的不知所謂，雞雞鴨鴨，番薯粟米就有得食，其他例牌野如壽司，中西美食等，應有盡無！不過為了早點去浸溫泉，我們一家人求其質飽個肚就算，都唔計較得咁多！
留言
發佈留言