已經兩年無踏足澳門了，選擇了連休假期的第一天，歷年來最熱的八月十五，重遊舊地，不知會帶來什麼驚喜呢？
太太叮囑我一定要訂噴射飛航，話無咁「傲」喎...(唔知有咩根據)。於是喺中旅社網站訂船票，以為十拿九穩啦！點知搭地鐵去上環途中，查看一下換票單據，原來自己訂錯哂方向，單上仲寫住：「不得退換、不得更換日期時間。」萬念俱灰之際，幸好中旅職員仍肯為我改票，太好了！但代價是因為烏龍而付出$120行政費用。
到達澳門只是早上九點半，第一站便到桃花崗的「咖啡明」食早餐。為爭取時間搭的士，點知司機完全未聽過桃花崗(旅遊書話係著名舊區)，仲叫我地不如講個街名啦。你知啦，澳門d街名真係好繞口架，好彩一聽個名，加埋係紅街市隔籬，好快就去到(叫羅約翰神父街)。落車後再問疑似街坊的途人，根本唔知咩係「咖啡明」，我話辣魚包好出名嗰間，佢就更擰哂頭(等於喺香港問菠蘿包好出名嗰間茶餐廳？)。差不多10:00，幾經波折終於搵到，因聽聞辣魚包好搶手，即刻同婆婆落order先，好彩仲有！
每次來澳門都必食豬扒包，但其實辣魚包都係好特色嘅地道美食。烘烤得金黃香脆的豬仔包內夾著辣得黎好惹味的沙甸魚，為我充足電，每個只賣MOP7。太太就似乎嘥左D，只吃份蛋治.....(無奈)。這裡另一特色，是仍保留矮枱摺凳，坐喺度嘆杯瓦煲凍啡，更添風味！六七十年代，好多工廠妹喺依區食晏，所以有「桃花崗、靚女多」之說，現在只剩下阿婆同大嬸喺度...(大嬸：三四十年前我都係一支花黎架！！).
著紅色間條依位仁兄就係咖啡明啦！
依度咪紅街市囉，真係好紅喎，係咪唔會油第隻色架？如果唔係咪要改名？
之後搭的去今天的第一個景點：盧家大屋。司機把車停在歷史遺產---「大堂」附近，就老點我地行條錯嘅路，令我對他們的優良服務留下很深的印象。
盧家大屋原來近在咫尺，為何以前來澳門都未有探訪呢？中西合璧的建築格局，最吸引我的是彩色的玻璃窗，令我聯想起歐洲的教堂。到訪當日，更請來工藝師，即場示範精湛的蘇繡技術，使我眼界大開。中式建築方面，細緻的木雕及石雕亦別具一格。太太猛問：影夠未呀？我答：真係未夠喉呀！
行到腳仔有d軟，諗住去坐低飲杯野，經過同是世界遺產城區之一的聖母玫瑰堂，忍唔住又要入來拍攝一番。太太信奉基督教，好像對這所天主教教堂興趣不大。
之前多次經過大門而不入，原來內裡裝潢典雅，空間感十足，比起歐洲很多教堂亦不遑多讓。這亦是少有讓市民用閃光燈拍攝的教堂。(是不管還是管不了？)
之後，到何生都大讚的音樂豆咖啡店歇一歇腳。我點了個招牌甜品咖啡果凍，但可惜雪糕機壞了，未能品嚐出名的米卡度咖啡軟雪糕。太太因傷風關係，點了檸樂煲薑(無奈x2)及咖啡葡撻。咖啡果凍：充滿咖啡香氣，吃後舌底回甘，值得一試！花奶及糖水可只行調校份量，滿足不同人士要求。
今次唔搭的啦，因去氹仔搭巴士都好方便啊！落車見到有條頗特別的樓梯叫「跛腳梯」。sorry呀依位女士，只係不經意影到你咋，希望你唔好介意啦。
又開始博物館之旅啦，今次到訪的是路氹歷史館，唔講唔知道，氹仔同路環原來都有十幾廿個別名架。(我反而唔知香港有咩其他「花朵」)
氹仔人都好熱衷於宗教信仰，當中包括觀音、譚公、三婆、羅漢等等。
見到這包裝招紙，勾起許多童年回憶。當年爸媽過年帶我到澳門玩，必會買「一百粒七彩龍吐珠」給我燒，唔知宜家仲有無得賣呢？
參觀完，返回售票處購買磁石貼留念。窗口內的職員似乎對我的相機很感興趣，仲話正常應該望唔到部機，因為我太高所以先特別留意，真係攪笑啦！
行完博物館，又係時間尋找氹仔美食。上次去過沙度拿餅店，太太對其木糠布甸念念不忘，決定再次光顧。我點了一個原味、一個藍莓味。一嘗之下，發覺其味道折然不同。原來買了「芝士木糠布甸」，怪不得口感像極cheese cake啦。太太嚷著要叫多一客original，今次無買錯了，令人懷念的味道，卻使我擔心之後會否吃不下午餐。另外買了一包自製曲奇回家。雖雪凍了仍發出香濃的牛油味，確值得一試！
留言
發佈留言